मेरा बु गावात मंदीरातील दान पेट्या चोरीला; लाखोंचा ऐवज लंपास !

 मेरा बुद्रुक गावातील तीन मंदिरात चोरी ; दारूबंदी विभागाच्या अधिकाऱ्यांवर बोट

अंढेरा /  ( द बातमीवाला ): अंढेरा पोलीस स्टेशन अंतर्गत येणाऱ्या मेरा बु. येथील हनुमान मंदिर, महादेव मंदिर आणि संतोषी मातेचे मंदिर या तीन भव्य मंदिरांतून रात्रीच्या अंधारात चोरट्यांनी दरोडा टाकून लाखोंची रक्कम लंपास केली.

आज ०४ नोव्हेंबरच्या सकाळी ही घटना उघडकीस आली. हनुमान मंदिरचे पूजारी दगडूजी वाळेकर यांनी मंदिरात पूजा करण्यासाठी गेल्यावर मंदिराचा दरवाजाचे कुलूप तुटलेले आणि दानपेटी फोडली गेली हे पाहून ते घाबरले. मंदिरात गेल्या दहा वर्षांपासून पूजा करणाऱ्या वाळेकर यांनी सांगितले की, दरवर्षी या दानपेटीत भाविक भक्त २० ते ३० हजार रुपये दान करतात.

या घटनेची माहिती मिळताच मंदिर संस्थेचे संचालक मंडळ आणि ग्रामस्थांनी अंढेरा पोलीस स्टेशनमध्ये तक्रार दाखल केली. पोलीस ठाणेदार विकास पाटील यांनी घटनास्थळी जाऊन पंचनामा केला आहे.

गावकऱ्यांचा आरोप : गावकऱ्यांनी सांगितले की, गावात राज्य उत्पादन शुल्क विभागाच्या अधिकाऱ्यांच्या आशीर्वादाने बेकायदेशीर दारूची विक्री सुरू आहे. यामुळे गावाला चोऱ्यांचे सावट निर्माण झाले आहे. गावकरी यांनी दारूबंदी विभागाच्या अधिकाऱ्यांवर गंभीर आरोप करत सांगितले की, दारू विक्रेते या अधिकाऱ्यांना हप्ते देतात आणि म्हणूनच त्यांचा हा बेकायदेशीर धंदा सुरू आहे. तसेच गावकरी यांनी पोलिस ठाणेदार विकास पाटील यांना दारूबंदी विभागाच्या अधिकाऱ्यांना ताकीत देत देवून गावातील अवैध दारूची विक्री बंद करण्यात यावी अशी मागणी गावकऱ्यांनी केली आहे. तसेच चोरट्यांना लवकरच अटक करण्याचे आश्वासन यावेळी ठाणेदार यांनी दिले आहे._________________________

  ग्रामस्थांनी या प्रकरणात कठोर कारवाई करण्याची मागणी केली आहे. त्यांनी सांगितले की, मंदिरे ही भाविकांची श्रद्धास्थान आहेत आणि अशा पवित्र स्थळांवर होणाऱ्या चोऱ्या अत्यंत निंदनीय आहेत.